2019 йылдың 6 һәм 7 февраль көндәрендә Мәсетле районы Оло Ыҡтамаҡ ауылы Мәҙәниәт һарайында Зәйнәб Биишева исемендәге Башҡортостан “Китап” нәшриәтенең сауҙа-йәрминкәһе үтте. Башҡортостандың һәм нәшриәттең ойошторолоуына 100 йыл тулыуға арналған күргәҙмә-йәрминкәгә халыҡ күпләп ағылды. Республикабыҙҙың төньяҡ-көнсығышында йәшәгән  мәсетле халҡын балалар әҙәбиәте лә, уҡыу ҡулланмалары ла, Башҡортостаныбыҙҙың тарихына, мәҙәниәтенә, арҙаҡлы шәхестәренә, тәбиғәтенә арналған фәнни-популяр хеҙмәттәр ҙә, мәктәп һәм мосолман календарҙары ла ҡыҙыҡһындырҙы. Ҡөрьән китабының яңы баҫмаһын туғандарына, яҡындарына, таныштарына бүләккә һатып та алды улар.

Мәҙәниәт һарайында 6 февралдә эстрадабыҙ йондоҙо, Башҡортостандың халыҡ артисы Нәзифә Ҡадырова етәкселегендәге  концерттың һәм 7 февраль көндө “Милли кейем – быуаттар мираҫы” исемле фәнни-ғәмәли конференцияның уҙыуы китап-күргәҙмәһе өсөн дә, сараға килеүселәр өсөн дә икеләтә шатлыҡлы булды. Бер юлы күңеленә оҡшаған, рухиәтенә яуап бирерлек китаптар һатып алып та, концерт ҡарап та, конференцияла сығыш яһап та өлгөрҙө мәсетлеләр.
Сауҙа-күргәҙмәһен ойошторорға ярҙам иткәндәре, асыҡ йөҙ, татлы һүҙ менән ҡаршы алғандары өсөн нәшриәт етәкселеге Мәсетеле районы хакимиәтенә оло рәхмәттәрен белдерә. Алдағы йылдарҙа ла бергә ҡулға-ҡул тотоношоп эшләрбеҙ тигән яҡты өмөттә ҡала!